កណ្តាល៖ រដ្ឋបាលខេត្តកណ្តាល បានចេញសេចក្តីជូនដំណឹងនាថ្ងៃទី៣០ ខែធ្នូ ឆ្នាំ២០២២ ឱ្យគ្រប់អាជីវកម្មកំពង់ចម្លងទាំងអស់ ក្នុងភូមិសាស្ត្រខេត្តកណ្តាល ត្រូវបញ្ឈប់ការប្រើប្រាស់ទូកឱបដើម្បីចម្លង ហើយត្រូវប្រើប្រាស់ទូកដែក ដែលមានទំហំ និងខ្នាត ស្របតាមលក្ខណៈបច្ចេកទេសទូកចម្លង។

រដ្ឋបាលខេត្តកណ្តាលបានប្រាប់ឱ្យអាជីវកម្មកំពង់ចម្លង ដែលកំពុងប្រើប្រាស់ទូកឱប ត្រូវផ្លាស់ប្តូរមកប្រើប្រាស់ទូកដែក ដែលមានទំហំ និងត្រូវខ្នាតវិញក្នុងរយៈពេល ៣០ថ្ងៃ គិតចាប់ពីថ្ងៃជូនដំណឹងតទៅ។ រដ្ឋបាលខេត្តបានបញ្ជាក់ថាក្នុងករណីមិនអនុវត្តតាមការណែនាំខាងលើ រដ្ឋបាលខេត្តកណ្តាល នឹងមិនអនុញ្ញាតឲ្យបន្តធ្វើអាជីវកម្មកំពង់ចម្លងជាដាច់ខាត។

លោកអភិបាលខេត្តកណ្តាលបានណែនាំឱ្យម្ចាស់អាជីវកម្មចម្លងទូកត្រូវមានប្រជាការពារម្នាក់ប្រចាំការតាមកំពង់ចម្លង ដើម្បីជួយសម្រួលសុវត្ថិភាពអ្នកដំណើរ។ ជាមួយគ្នានេះត្រូវដាក់ស្លាកណែនាំសុវត្ថិភាពជូនអ្នកដំណើរឲ្យយល់ដឹងនៅពេលធ្វើដំណើរឆ្លង និងត្រូវត្រួតពិនិត្យលក្ខណៈបច្ចេកទេសទូកដូចជា ពោងសុវត្ថិភាព ភ្លើងបំភ្លឺ ខ្សែពួរ អាវពោង និងកំណល់។

ទន្ទឹមនេះ អ្នកបើកបរទូកចម្លង ក៏ត្រូវមានប័ណ្ណបើកបរទូក និងត្រូវរៀបចំផ្លូវឡើង ចុះ និងផែឲ្យបានល្អប្រសើរស្របតាមលក្ខណៈបច្ចេកទេស។ លោក គង់ សោភ័ណ្ឌ បានសង្កេតឃើញថា ម្ចាស់អាជីវកម្មកំពង់ចម្លងក្នុងខេត្តកណ្តាលទាំងអស់ មិនទាន់អនុវត្តតាមលក្ខណៈបច្ចេកទេសទូកចម្លងពេញលេញនៅឡើយទេ។

ដោយសារតែមិនចង់ឃើញឧបទ្ទវហេតុលិចទូកដចម្លង ដូចនឹងករណីលិចទូកចម្លងនៅកោះចម្រើន ឃុំកំពង់ភ្នំ ស្រុកលើកដែក ខេត្តកណ្ដាល ដែលបង្កឱ្យបាត់បង់អាយុជីវិតសិស្សសាលាចំនួន ១២នាក់ កាលពីថ្ងៃទី១២ ខែតុលា ឆ្នាំ២០២២ លោកក៏បានណែនាំឱ្យស្នើដល់គ្រប់ស្ថាប័ន មន្ទីរ-អង្គភាពពាក់ព័ន្ធ រដ្ឋបាលក្រុង-ស្រុក រដ្ឋបាលឃុំ-សង្កាត់ ត្រូវចូលរួមសហការ អនុវត្តសេចក្តីជូនដំណឹងនេះឲ្យមានប្រសិទ្ធភាពខ្ពស់៕